• محمود عبد الشافى
  • 2016-08-31

انا مقيم في الخارج ونفسي اشغل شقي الغربة في العقارات مصر ... ايه أفضل حاجه ؟ 
بص يا سيدي 
١ - هتشوف حد ثقة تتعامل معاه ويكون عينيك جوه مصر ... وده مش المطلوب منه خبرة ... ده شخص انت واثق فيه ، وواثق كمان انه يعتمد عليه ونفسه طويل ( اخوك ، صاحبك ..... الخ )

٢- المصادر اللي هتتعامل معاها علشان تشوف العقارات المعروضة للبيع دلوقت بقت ساهله مش زي زمان ، تقدر تدخل علي مواقع الإعلانات المجانية ، ولو عجبتك شقه في نفس امكانياتك ، ارجع لورا شوية بالسيرش علي نفس المنطقة في سنه فاتت وشوف الأسعار كانت ايه من سنة ولو الفرق كويس في الزيادة ، ابدأ كلم الشخص اللي اتكلمنا عليه يروح يعاين ...
 
٣- وجودك برة بيدي فرصه اكبر للشيطان يلعب بدماغ اللي شاركته وخصوصا لو المكسب كبير ..
فأنا ضد أنك تدخل مع اي شراكة طالما مش واثق فيه الثقة العمياء ، فخليك في حاجه علي قد امكانياتك واستلم حاجه بمفتاحها او ارض متسورة وهكذا ..،

٤ - ممكن تدور علي حاجه ( لقطة ) لو عاوز حركة سريعة ، وده مش هتعرفه لوحدك في الاول لكن ممكن تعرفه مع الممارسة ،
واللقطة " هي الحاجه اللي معروضه باقل من تمنها انهردة " يعني لو اشتريتها وعرضتها بتمنها تتباع بسهوله ، فممكن مبدئيا تستعين باي حد له علاقه بالمجال العقاري .

٥- لازم تربط فلوسك بعقار داخل مصر سواء استثمار او سكن وعلي قد فلوسك مهما كانت قليله نسبيا ، علشان أسعار عقارتنا ملهاش اي معيار ثابت ... بتزيد بغباء والجنية قيمته بتنزل بغباء بردة



#محمود_عبدالشافي