اتاكد من ايه علشان اطمن علي أوراق ملكية #الشقة او #الارض اللي بشتريها ؟ 🙄

أول حاجة لازم تتراجع هي ( عقد الملكية ) ، سند ملكية البائع اللي هو عقد الشراء بتاعه ، و ده لازم يتراجع عن طريق محامي ثقة ( يعني من طرفك و يبقي في جنبك مش في النص حتي )

- وعلشان كده لازم تستعين بمحامي ثقة 
والرخصة و إيصال الكهرباء او المياة او التليفون ملهمش دعوة بالملكية

تاني حاجة لازم تعرف ايه الإجراء المتٌخذ علي العقد ، يعني هل هو عٌرفي ( يعني متاخدش عليه إجراء ) ، ولا متاخد عليه حكم صحة توقيع ( ودي دعوي بتناقش التوقيع فقط بدون دراسة سند وتسلسل الملكية اصلا ) ، و لا حكم صحة ونفاذ ( ودي دعوي بتناقش تسلسل الملكية و المساحة وخلافة وأقوي طبعا من صحة التوقيع بكتير ، و لا مسجل في الشهر العقاري و دي أقوي حاجة و القانون المصري لا يعتد باي نقل ملكية الا بالتسجيل في الشهر العقاري ( وده ليه بوست لوحده ان شاء الله )

- و علشان كدة لازم تشوف وتستعين بمحامي ثقة 
والرخصة و إيصال الكهرباء او المياة او التليفون ملهمش دعوة بالملكية

تالت حاجة لو الشقة تابعه لهيئة المجتمعات العمرانية تعمل ايه ؟ 
تسال عليها في بنك التعمير والاسكان او الجهاز اللي تابعه ليه عليها اقساط من عدمة ، ولو عليها فعليها قد ايه وتتفق مع البائع مين هيدفع الاقساط دي انت و لا هو .. ولو عاوز يحصل تنازل ليك مباشرة في البنك يبقي هتدفع كل الاقساط اللي عليها او تسال في البنك قبل ما تشتري عن مدي إمكانية التنازل بالوضع الحالي ، وفِي كل الأحوال لازم ترجع للبنك و الجهاز .. تمام ؟

طيب لو ارض تابعه لهيئة المجتمعات العمرانية ؟! 
هتسال في الجهاز ويكون معاك المالك طبعا لو ملكش حد في الجهاز يخدمك علشان مش هتاخد اي معلومة لأنك ملكش صفة ، وتشوف عليها اقساط ولا لا .. وتقدر تطلب من المالك يجيبلك ورقة مخالصة من الجهاز او بالموقف المالي للقطعه بتاريخ وقت الشراء 
كمان هتسأل علي مٌهلة البناء المسموحة للقطعه دي ..

والبوست الجاي هنكمل علي الكلام ده علشان كلامنا يكون خفيف خفيف .. وفِي ازاي متقعش عليك اي غرامة من هيئة المجتمعات العمرانية سواء كنت شقه او ارض او تجاري 
و نكمل موضوع الملكية فوق واهم البنود اللي لازم تكون موجودة في عقدك وايه الحلول المقترحة للبيع او الشراء لو الشقة او الارض لسه متسلمتش للجهاز او عليها اقساط

والرخصة و إيصال الكهرباء او المياة او التليفون ملهمش دعوة بالملكيييييييييية 😩

ومتنساش في كل الأحوال تستعين بمحااااااامي ثقة في اي خطوة بيع او شراء 😬

لو مهتم .. اكتب (تم ) واعمل شير🤗
#عيوب_العقارات
#بيتك_بايدك
#محمود_عبدالشافي