الناس الى هتاخد حاجه تحت الانشااااااء .. 🤗
فى أكتر من نوع تشطيب لازم تعرفوه وكل نوع يفرق كتير عن التانى ... متغركوش حيطان الشقة ... التطشيب أغلى من المبانى ساعات

اولا :- بدون تشطيب 
وده بيكون على الطوب الاحمر وحلوق الباب والشباك ووصلة سباكة ووصلة كهرباء لحد الشقة ( طبعا ً ممكن يكون أكتر من كده لكن مش أقل )

ثانيا ً:- نصف تشطيب 
وده بيكون على البياض أو المحارة وخراطيم اسلاك كهربائية داخلية فى الغالب فارغة او فاضية مفيهاش سلك و وحلوق الابواب والشبابيك الداخلية بالكامل وباب شقة ووصلة سباكة و وصلة كهرباء لحد الشقة ( ممكن يكون أكتر من كده بانه يملى خراطيم بالاسلاك )

ثالثا ً :- لوكس او سوبر لوكس 
بصوا فى نوع التشطيب ده ولا تحفظوا اى اسم لا لوكس ، ولا سوبر لوكس ، ولا فندقى ، ولا بانوراما ... كلها اسماء ملهاش اى وصف دقيق ... فلازم فى ده تكتب نوع الارضية مثلا هى سيراميك و لا بورسلين ولا رخام ... الخ ، ونوع الدهانات وهكذا وده فى الغالب مش هينفع يتكتب فى العقد .. لكن ممكن يكون فى ملحق للعقد وكمان لازم يكون فى محضر استلام متمضيش عليه الا بعد ما تستلم كافة التشطيبات المتفق عليها .... الملحق ومحضر الاستلام لازم يكون منصوص عليهم فى العقد وجزء لا يتجزأ منه 
طبعا كلا كلامى على الشقة من جوة 

وفى كل الاحوال لازم ناخد بالنا من شوية الحاجات دى 
فى حالة بدون تشطيب .. تتاكد ان يكون منصوص فى العقد على توصيل أساسى السباكة و الصرف و اساسى الكهرباء

فى حالة النصف تشطيب هستأذنك لو ناوي تعمل تشطيبات و حركات فى الاضاءة و الاسقف و الذى منه يبقى قول للراجل يستنى عليك فى بند المحارة لحد ما ترمي انت نقط الكهرباء و الحاجات اللى ممكن تتكلف تكسير المحارة من الاول علشان تعملها من تانى ... لو معملتش ده هتدفع تمنها المحارة مرتين 😏

فى حالة السوبر اللوكس او اللوكس لازم توصف كل بند بالتفصيل .. يعنى مش كفاية تقول سيراميك .. لازم تقول سيراميك نوعة ايه و درجته ( فرز اول , تانى ، تالت ) و هكذا فى كل البنود

الحاجات دى بتخسر ناس كتير والله ... فاعملوا شير و ادونا ثواب وخدوا انت كمان ثواب 🤗
انت بتكسل تعمل شير ليه ؟ .. ده انا مكسلتش اكتبلك الكلام ده كله كل يوم ياخى ☺️
#عيوب_العقارات
#بيتك_بايدك
#محمود_عبدالشافي