ندي قطعه #ارض في #الاسكان_الاجتماعي مساحتها ٢٧٦ متر في مدينة بدر ... ايه افضل استثمار ليها ؟

خلينا هنا نجاوب بشكل عام علي قطع الاسكان الاجتماعي اللي بتتراوح من ٢١٠ متر : ٢٩٠ متر في كل المدن الجديدة ( بدر ، اكتوبر ، اسيوط الجديدة ، المنيا الجديدة .... الخ )

قدامنا ٣ تصرفات
اولا : اما اننا نبنيها علشان نبيعها شقق .. وده غلط !
الشقق هناك التكلفة بتاعتها قصاد السعر السوقي مش مجدية ، لانها في الاخر محافظة علي طبقه سكنية معينة ، فهتلاقي اللي معروض عليه الشقه قدّامه ياخد بنفس سعرها في منطقه أرقي 
لكن لو هنبنيها بهدف السكن فده شيء لطيف ومعندكش مشكلة طالما مفيش مشكلة في المكان

ثانيا : نعيد بيعها تاني و نشوف قطعه تانيه .. وهنا ليها ميزة و عيب
الميزة ان دايما الاستثمار افضل في كثرة المعاملات ، يعني لو مدة الاستثمار سنة فالعائد بين أني أسيب الارض سنة و اني أبيع وأشتري ٣ مرات خلال سنة .. فالعائد في الحالة التانية افضل طبعا
بس لو عارفين ان في حاجة هتحصل في المنطقه خلال شهور ممكن ترفع سعرها يبقي نستني لما تتعمل وبعدها نبيع

والعيب انك لو كنت اخدت الارض من البنك مباشرة فانت هتفقد فرصة انك تقدم تاني وترسي عليك ارض من الدولة تاني 
يبقي الخلاصة انك لو هتسثمر في قصة الاراضي .. اشتري وبيع من غير ما تقدم

ثالثا : انك تشارك عليها
يعني تشوف حد يبنيهالك و ياخد نصيبه شقق ، وهنا بنقدر سعر الارض و سعر المبني و الموضوع نسبه وتناسب ، ممكن ٥٠٪‏ : ٥٠ ٪‏ وممكن تختلف ... والموضوع ده هنتكلم عنه باستفاضة البوست الجاي ان شاء الله 
المهم انك متعملش كدة الا في حالتين ...لو مهلة المباني زنقت عليك وهنا لازم تلحق علشان متتسحبش منك الارض 
او انك عاوز تسكن ومش معاك اصلا تكلفه المباني ، فهنضطر بردة نعمل ده

في اول تعليق هتلاقي رابط يوصلك لكل المعلومات اللي نزلت قبل كده 👇

اتمني تكون معلومة لطيفه مفيدة ... ولو يهمك توصلك المعلومة الجاية ، اكتب ( متابع ) واعمل شير علشان الخير 🤗
#عيوب_العقارات
#بيتك_بايدك
#محمود_عبدالشافي