• محمود عبد الشافى
  • 2017-08-29

يوم عادى , و في قعدة لطيفة مع والدة و والدته و اخواته و اتكلمت اخته الصغيرة وقالت – ليه منبعش الشقة دي و نشوف حته أرض و نبنيها و كل حد فينا يكون معاه شقة و نعيش مع بعض ؟ 
- رد الكبير , و الله ياريت و فكرة حلوة , ايه رأيك يا بابا ؟ 
- شوفوا , احنا شقتنا في منطقة كويسة و مستواها طيب , لو بيعناها هل هنعرف نجيب بيت او ارض و نبنيها و نشطبها و نسكن فيها ؟ 
- رد الأخ الكبير وقال طيب هي تجيب في حدود كام ؟ 
- وهنا عم الصمت أرجاء المكان .... محدش عارف تجيب كام ... نعمل ايه ؟ 
وهنا قرروا ياخدوا زيارة لعالم بيتك بايدك و يسألوا ... وكانت الإجابة كالتالى

بديهى حبايبنا لو هنفك الشقة لبيت او ارض ... يبقى أكيد هننزل في مستوى المنطقة سواء من حيث الموقع او الخدمات او المستوى الاجتماعى

قبل ما ناخد قرار زى ده .. لازم نعرف الاول شقتنا تجيب كام ؟ ... ازاى ادخل مطعم و اطلب أكل من غير ما ببص على المنيو بتاعته علشان اعرف في امكانياتى و لا لا ؟ ... يبقى لازم نشوف طريقة نعرف بيها سعر شقتنا كام في السوق انهردة

علشان نعرف سعر اى شقة لازم نسأل حد متخصص في العقارات ( و معنى كلمة متخصص هنا انه على دراية كاملة بأسعار المنطقة اللى هنسأل فيها عن سعر شقتنا ) مينفعش اسال حد شغال في اسكندرية عن سعر شقة في بورسعيد ... وكمان مينفعش اسال مقاول على سعر الشقة .. المقاول بيبنى و المهندس بيبنى .. احنا هنا محتاجين مسوق عقارى ... و ده تحت اى مسمى تحبوه ... سمسار , مكتب وساطة .... أي مسمى ... المهم هنا يكون مشهودله في المنطقة بالامانه في ذكر المعلومات و له تاريخ يخاف عليه .. مش هيجاملك و لا هيجامل المشترى علشان اسمه .. تمام ؟

طيب مبنحبش نتعامل مع سماسرة او وسطاء ... نعمل ايه ؟ 
زمان كانت مشكلة .. لحد كده ٢٠٠٥ تقريبا ... من التاريخ ده و ظهرت مواقع الإعلانات والجرايد المجانية .. سهل جدا تدخل على اى موقع بحث و ترمي الكلمتين دول ( للبيع شقة في شارع ...... ) الإعلانات اللى هتظهر دى هتديلك متوسط سعر شقتك .. مش سعرها 
في حاجات بتختلف من شقة لشقة حسب مواصفاتها ( زى المساحة و الدور و وضع العقار اللى موجودة فيه الشقة و تشطيبها و .... و دى هنتكلم عنها بعدين ) 
فلو سعر الشقة اللي شفتها في الإعلان ٣٠٠٠ جنية للمتر مثلا و قريبة منك في المساحة و التشطيب يبقى نبنى عليه متوسط فلوس هنمسكها في أيدينا فلو شقتك ١٥٠ متر يبقى احنا معانا ٤٥٠ الف 
طيب حلو كده نروح نبيع ؟؟؟ ... اثببببت لا طبعا اهدى شوية ! 
الباشا اللى ورا هناك ده بيقول يبقى ندور على ارض في حدود ٤٥٠ الف ... برافو عليك .. لبستهم انت كده في الحيط 😀
مننساش اننا عاوزين بيت مش ارض .. لان الأرض لوحدها هنعمل بيها ايه ؟ 
يبقى نشوف ارض مثلا في حدود نص المبلغ علشان الباقي نكمل بيه 
( طبعا الأرقام الى فوق دى مجازية مش حقيقية ) 
او نشوف بيت كامل مبنى في حدود ٤٥٠ الف بس بشرط ... يكون متشطب يا جميل ... هناخدة بدون تشطيب و نقعد نعمل بيه ايه ؟ طبعا الا لو كان معانا تمن التشطيبات

هنرجع لنفس موقع البحث اللى كنا عليه و نكتب ( منزل للبيع في ( المدينة ) و نحدد السعر ٤٥٠ الف ) و المناطق اللى هتظهرلك دى هي اللى ممكن تلاقي فيها بيوت في الامكانيات دى ... هل حضرتك تقدر تعيش فيها ؟ 
لو اه ... يبقى الاول نشوف البيت وندور عليه لحد ما نستقر على حاجة تعجبنا و نربطها بس بعربون و ناخد مهله كبيرة او نحاول ناخدها ( يعنى حوالى ٣ شهور مثلا ) و في نفس الوقت لازم نكون ما شيين في الاتجاهيين ... بيع الشقة و شراء البيت .. طبعا ده ده بفرض ان البيت عجبنا و المنطقة 
اما بقي لو المنطقة مش تمام ومعجبتناش او البيوت مساحاتها مش مناسبة ... نكمل أكلنا و كل واحد يقوم يغسل ايده ودماغه معاها في نفس الوقت 
لان كتير بيوقعوا في المشكلة دى 
تيجى الفكرة ... نبيع الشقة ... ندور على البيت ... منلاقيش البيت ... نقعد في ايجار ... الأسعار و لعت .. ولا عارفين نرجع نشترى شقة تاني زى اللى كانت معانا ... ولا لاقيين بيت ... و الفلوس تتسرسب و احدة واحدة .. و للأسف .

كل كلمة كتبتها من الواقع ... لو تعرف حد بيفكر التفكير ده اعمله منشن .. وضيف رأيك طبعا ... و في كل الأحوال اعمل شير علشان اللى جاى أظرف و أظرف في #عالم_بيتك_بايك 🤗
#بيتك_بايدك
#محمود_عبدالشافي